Görkəmli fransız yazıçısı Onore de Balzakın ən məşhur əsəri "Bəşəri komediya" epopeyası hesab olunur. Müəllif bu epopeyada fransız həyatını bütün incəlikləri ilə təsvir etməyi qarşısına məqsəd qoymuşdu.
Özündə 90 roman və novellanı birləşdirən "Bəşəri komediya"ya "Qobsek", "Polkovnik Şaber", "Yevgeni Qrande", "İtirilmiş xəyallar", "Kurtizankanın dəbdəbə və səfaləti" kimi məşhur əsərlərlə yanaşı, 1834-cü ildə qələmə alınmış "Qorio ata" romanı da daxil edilmişdir. Balzak bu dahiyanə romanında iki qızını ifrat dərəcədə sevən fədakar bir atanın faciəvi obrazını yaradıb. Fəhləlikdən varlı fabrikantlığa yüksələn Qorio arvadını erkən itirdikdən sonra bir daha heç vaxt evlənmir, bütün həyatını iki qızına həsr edir. Onun faciəsi isə qızlarının ailə qurmasından sonra başlayır...